向大家誠意推介呢本書，用達賴喇嘛愛貓嘅角度出發，帶讀者去參透一啲人生嘅道理，內容有趣而淺白易明。分享其中我覺得好有意思嘅一節故事：

達賴喇嘛每日都要接見無數嘅客人。有一日佢嘅坐上客係一位密宗女修行人，修行人同佢分享去美國監獄探望一班無期徒刑嘅囚犯，並教佢地靜坐。其中一位囚犯問到：「你地喺阿尼拉嘅修院，全日到底有咩做咖呢？」

修行人就答：「我地都係清晨五點起身，跟住就係第一場靜坐，直到晚上十點上床瞓覺。所有活動都係學習同讀經，同喺廟方嘅農地度工作，自己種植要食嘅水果同蔬菜。」之後囚犯話：「嘩，我唔想咁樣生活。」（因為即使監獄都要早起，都起碼可以7點起身。）

之後修行人再答：「我地無電視、報紙睇，無酒飲，都無電腦可以上網。我們唔似監獄入面，犯人可以賺錢買鍾意食嘅嘢同一啲好玩嘅嘢。更加唔會有異性黎探我地。」

跟住囚犯竟然不自覺地講左句說話：「如果廟入面嘅生活咁艱苦，歡迎你黎呢度同我地一齊住！」

然後達賴喇嘛同在場其他人都爆笑。

修行人：「佢係真心為我感到難過！佢覺得廟入面嘅生活比監獄差太遠了。」

呢個故事證明左：我地快唔快樂，唔係因為生活環境，而係我地看待事物嘅眼光。

達賴喇嘛補充：「大多數人嘅諗法係唯有改造環境，先可以快樂。但環境並非不快樂嘅真實理由。比較相關嘅係大家對自己所處環境嘅想法。」

修行人鼓勵學員將監獄變成寺廟，唔好諗喺入面嘅時間係浪費生命，而係要諗喺裡面係一個追求個人成長嘅大好機會，就會為自己帶黎不可思議嘅轉變，可以搵到人生真正嘅意義同目的，出獄後都可以成為一個徹底改期換面嘅人。

Cathy祝願以上嘅故事可以幫助大家轉念，特別係身處逆境中嘅客人。無論身處嘅環境再差、遇到嘅難題再大，都可以因為一個轉念而令事情再不一樣。