尋日有客人問左我一個令人心痛嘅問題：「我可以喺佢身邊，一直做小三等佢離開女友嗎？」

喺我嘅客人入面，有第三者、有先生不停外遇嘅妻子、亦有一腳踏兩船嘅當時人。一般人會覺得，做第三者一定係錯、犯賤；一腳踏兩腳一定係賤男/ 姣婆/ 人渣；「正印」一定係啱曬，同你一齊咁耐，你有責任要永遠愛我。

但對於我黎講，道德標準係人去建立，但喺宇宙嘅角度係無對錯同二元對立，一切只係課題。靈修就係學習用愛同更高嘅角度去睇事情，以療癒同跨越課題為目的，而非單純用人嘅標準去責怪自己或逃避課題。

三個唔同嘅角色，喺更高嘅角度去睇，只係唔同嘅劇本、唔同嘅課題：

過往曾經幫過先生外遇嘅妻子做解讀，Keeper 話，對妻子黎講，先生不停外遇，俾佢嘅課題係要搵返自己嘅價值，唔需要不停諗先生同其他女士做緊咩、仲有無外遇，而係要學習穩住自己，因為不停外遇嘅先生只係妻子嘅一面鏡，反映到妻子有幾唔愛自己？就算先生對佢有更大更多嘅傷害，依然想死守一段感情，而唔係相信自己可以有更好嘅選擇，將人生嘅選擇權交俾其他人操控。

至於今次嘅解讀，Keeper 表示作為第三者嘅客人其實同男友已經經歷過好多世嘅相遇，每一世都因為timing 或身份懸殊而無疾而終。今世男友對拍拖多年嘅女友其實已經失去愛情嘅感覺，但因為責任而唔敢離開，其實內心亦爭扎左好耐，唔想不斷重覆外遇、分手、再外遇呢個循環，佢同客人分手時亦有心痛嘅感覺，但即使傷心亦唔可以同外人提起，令佢覺得好難受。男友嘅課題係離開自己嘅舒適圈、勇敢面對未知嘅未來，尋找自己真正喜歡嘅人同事。

至於作為第三者嘅客人，Keeper 嘅訊息係，今次嘅事件係佢同男友早已約定嘅靈魂旅程，約定再次相遇、共同學習，透過感情上嘅課題療癒自己，同時療癒同父母長久累積落黎嘅課題。唔需要做第三者，因為要抱緊自己嘅價值，相信自己值得擁有對方全部嘅愛，亦相信男友可以跨越課題。Keeper 最後表示客人將來會係一位療癒師，課題難係因為責任重大，先經歷就更懂得將來服務對象嘅感受。明白一切都係學習嘅旅程，相信一切自有其安排、放手臣服於宇宙嘅智慧。

以上嘅解讀只係例子，Keeper 俾每個人嘅訊息都唔同，以經歷先生外遇嘅妻子為例，有啲客人會叫佢堅持，但有啲客人會建議佢離開關係，亦唔好誤解我係美化外遇關係，唔係所有外遇都有靈魂約定，所以並無絕對嘅答案，亦正正解釋左一切只係唔同嘅劇本、唔同嘅課題。唔需要羨慕/怪責/怨恨任何人，每個人都有其課題，我地覺得對方嘅課題輕鬆，只係剛好我地唔係當事人。

但願我地都可以從課題中獲得智慧與成長。