作為解讀師，有時都會遇到難題，就係一啲唔知答唔答好嘅問題。

今日嘅難題係：「我應唔應該去紋身？」

在於我個人立場，我係唔鼓勵人紋身的（但唔係我認為呢件事係錯），加上我覺得呢條問題事關重大，可能客人會因為我一個答案而去做關乎一生嘅決定。但之後我又諗，我唔答，客人係咪就唔會去紋先？定係佢都係會搵其他途徑搵答案？最後我決定相信keeper嘅智慧，唔好諗咁多，照問左先。而我嘅問題set 做：「如果紋身嘅話，將來會否後悔？」

Keeper 嘅答案：「你紋身嘅話，將來唔會後悔，因為即使你未來已經學懂愛自己，回頭再望呢個紋身，你仍然覺得係你成長重要嘅經歷，你會感激今日呢個自己。但係你可以去諗，到底你係咪真係需要去紋身呢？Keeper突然俾左一句歌詞我-「沒有留下紋身，刻骨一樣銘心」（盧巧音嘅歌）當你真正相信呢件事 - 當你真心覺得自己係值得被愛，相信自己有能力可以學會愛自己嘅時候，你係咪真係需要去紋身呢？你係咪需要外在嘅嘢去加強你自己嘅信心呢？嘗試將自愛呢個思想深深植入你嘅心，而唔係植入你嘅皮膚，你可以再過多一排先去做紋身呢個決定，俾時間自己去思考同成長，建議你三個月後先至去做決定。呢三個月你唔係只坐喺度等，乜都唔做，而係呢三個月去睇好多唔同嘅自我成長、自愛嘅書，三個月之後你仍然好想去紋，先再去行動。但當你行動嘅時候，都要諗一啲實際嘅因素，例如係當你搵工嘅時候，會唔會俾呢個紋身影響咗呢？又或者如果你去日本旅行，因為纹身而被店家拒絕你入溫泉嘅時候，你會有咩感覺呢？除左先俾時間自己自我成長，再諗一諗實際嘅因素、有可能遇到嘅問題先再去做決定。」

感謝Keeper嘅答案，令我有種放下心頭大石嘅感覺。諗返我地都唔鍾意人地直接同我地講：「唔做得！」/「唔可以！」唔鍾意人直接幫我地做決定，但盲目去附和對方想要嘅答案亦唔係真正為對方著想。相信世事萬物無絕對嘅對與錯，感謝keeper引導客人思考，尋找屬於自己嘅答案。

過後客人亦有問到有關守護天使嘅問題，我亦幫佢連結到守護天使，拎到天使俾佢嘅一啲鼓勵說話。

今次係客人第二次搵我做解讀，聽到客人話急燥嘅時候，會睇返我俾佢嘅訊息，有療癒到嘅感覺，我都覺得好開心好欣慰🥺而呢個亦係文字解讀嘅好處，就係方便隨時可以睇返，唔洗怕唔記得。

祝福呢位客人一日比一日更愛自己，可以自信地自我尋求生命中嘅答案💕